Grao en FILOLOXÍA CLÁSICA (Universidade de Santiago de Compostela)
Implantación a partir do curso 2009-2010

---

O Grao en Filoloxía Clásica ten como principal obxectivo o estudo das linguas, as literaturas e as culturas Grega e Latina, así como o da súa pervivencia e influencia decisiva na civilización occidental e en todas as civilizacións da Terra.

O plan de estudos posibilita a aprendizaxe do Grego clásico e do Latín,así como das súas respectivas literaturas, buscando un equilibrio entre materias teóricas e prácticas. A aprendizaxe das linguas realízase a través do estudo da fonética, a morfología e a sintaxe, combinado coa tradución e o comentario de textos. Os coñecementos lingüísticos constitúen a base que permite ao alumno introducirse na literatura e na teoría literaria.

O Grao ofrece tamén coñecementos avanzados noutros campos tradicionalmente vinculados coa Filoloxía Clásica: a crítica textual, a paleografía, a mitoloxía e a relixión, o pensamento clásico, as institucións. O estudo da evolución e a historia das linguas, na cal destaca a lingüística comparativa indoeuropea, permite adquirir a máis ampla e profunda persepectiva de análise da diversidade cultural.

O panorama que se ofrece ao titulado en Filoloxía Clásica inclúe, xa que logo, a mellor perspectiva para un estudo comparativo das principais linguas europeas; en especial, podemos destacar no noso Departamento unha consolidada tradición de Estudos Medievais,fundamentais para comprender a historia cultural de Galicia na súa contorna europea.

Saídas e perfís profesionais

A saída profesional máis xeneralizada é o ensino no nivel de secundaria. Con todo, a enorme preparación e capacidade analítica e crítica que proporciona a Filoloxía Clásica permiten tamén aos graduados competir con vantaxe en moi variados ámbitos profesionais: o mundo editorial, bibliotecas, arquivos, museos, empresas de servizos culturais e de patrimonio histórico-artístico, etc.

Podes descargar dende aquí o documento completo do Proxecto de memoria para a verificación do título de Grao, aprobado pola Xunta de Facultade e Consello de Goberno o pasado ano.

O vindeiro xoves 23 de abril terá lugar a representación de "Las Nubes", de Aristófanes, polo grupo de teatro Prósopon do IES Poeta Díaz Castro de Guitiriz (Lugo)

Será ás 19:00 horas no Salón de Actos da Facultade de Filoloxía de Santiago de Compostela.

E entrada é libre. No caso de que algún profesor de IES quixera asistir cos seus alumnos, chame a Teresa Amado ao 981 563100, ext. 11888, horario de 11:30 a 13:00, ou envie un correo-E a este enderezo.

 

*imaxe: respresentación de Miles Gloriosus polo grupo Prosopon.

A Facultade de Filoloxía vai celebrar os días 17 e 18 de abril unhas xornadas formativas dirixidas especificamente a orientadores e profesores de linguas e literaturas dos centros de Secundaria, co fin de dar a coñecer a súa nova oferta de estudos de grao e máster.

Cumprindo un dos puntos do noso programa, SeecGalicia organizou unha viaxe cultural á Grecia clásica. Participan seis institutos de Galicia (Menéndez Pidal, Agra de Leborís, Saturnino Montojo, Moncho Valcarce, Xosé Pichel e Pedregal de Irimia) cun total de 34 alumnos e 6 profesoras; viaxan dende o sábado 14 ata o sábado 21 de marzo.

O programa é facer un percorrido pola Grecia clásica:

Será unha viaxe fascinante para os nosos alumnos de Cultura Clásica, Latín e Grego.

* imaxe de Gisleno F. L. pertencente ao mural de Chiron.

A Comisión do Certamen Ciceronianum 2009 elexiu como gañadora da fase nacional á alumna ROSANA CRUZ ALONSO, do IES "Venancio Blanco" de Salamanca, cuxa profesora é Dña. Amelia Rodríguez Sánchez-Bordona.

Durante os días 9, 10 e 11 de marzo celebrouse o IX Festival de teatro Grecolatino de Lugo. Fixo a inaguración Cecilia Criado, presidenta da sección galega da SEEC, quen entregou os premios aos equipos gañadores do concurso de cultura clásica Odisea 2009.

O primeiro día o grupo Hypnos, do IES Francisco de los Ríos de Fernán Núñez, Córdoba, levou a escena as Bacantes de Eurípides e Lisístrata de Aristófanes, con espléndido resultado estético e gran forza expresiva malia a xuventude dos actores. O martes actuou Balbo, do Puerto de Santa María, pioneiro dos grupos escolares de teatro grecolatino. Estreaban Antígona de Sófocles e reestreaban Mostellaria de Plauto, con cambios na posta en escena que aportaron dinamismo e cor á obra. O terceiro día o grupo Prósopon do IES Poeta Díaz Castro de Guitiriz, ofreceu Nubes de Aristófanes e Miles Gloriosus de Plauto, resolvendo con acerto as dificultades técnicas que supón sobre todo a posta en escena de Aristófanes.

Como todos os anos a resposta á nosa convocatoria foi excelente. Por primeira vez alcanzamos a cifra de 90 centros asistentes e 4.321 espectadores, procedentes de toda Galicia, Asturias e León. O noso agradecemento a todos eles, en especial aos profesores, que se encargan de animar aos alumnos, traballar os textos e organizar un día de teatro e cultura na cidade de Lugo.

Unha vez máis queremos deixar constancia pública do nosa débeda de gratitude co concello de Lugo, que a través da súa concellería de Educación sufraga parte dos gastos do noso festival. Sen eles non o poderíamos sacar a diante.
Baixa o telón, pero desde este mesmo momento empezamos a preparar o festival do ano próximo, que pretendemos que sexa especial, xa que chega á décima edición.

Para iso necesitámosvos a todos, como espectadores, como colaboradores ocasionais ou como socios da SEEC, que en definitiva é quen fai o esforzo de continuar cun labor que comezou modestamente, pero leva posto ante os dramas clásicos a máis de 25.000 mozos nestas nove edicións.
Graciñas e ata o ano vindeiro.

Visita a Galería de imaxes desta edición do festival.